बुटवल/ यूथफोर्स रुपन्देहीका तत्कालीन जिल्ला सदस्य तथा एमाले कार्यकर्ता प्रचण्ड थैबको हत्याका आरोपित वाईसीएल रुपन्देहीका तत्कालीन अध्यक्ष सुजित बिकलाई प्रहरीले रुपन्देहीमा ल्याएको छ ।  
काठमाडौं प्रहरीले रुपन्देही प्रहरीलाई अनुसन्धान र मुद्दाका लागि बिकलाई हस्तान्तरण गरेको हो । आरोपी बिकलाई एती एअरको शुक्रबार बिहान ९ बजेको उडानबाट भैरहवा ल्याईएको हो । भैरहवा विमानस्थलबाट बिकलाई सिधै जिल्ला प्रहरी कार्यालय रुपन्देहीमा ल्याइएको थियो ।
शुक्रबार दिउँसो जिल्ला ल्याइएको लगिएको रुपन्देही प्रहरी प्रमुख तथा प्रहरी उपरीक्षक शेर बहादुर बस्नेतले बताउनु भयो । यसअघि इलाका प्रहरी कार्यालय बुटवलले रुपन्देही जिल्ला अदालत भैरहवामा थप अनुसन्धानका लागि हिरासतमा राख्न म्याद थप गर्ने आदेश मागेको थियो । अदालतले सात दिनको म्याद थप गरेको इलाका प्रहरी कार्यालय बुटवलका प्रहरी नायब उपरीक्षक दान बहादुर कार्कीले बताउनुभयो । बिकलाई इलाका प्रहरी कार्यालय बुटवलको हिरासतमा राखि अनुसन्धान सुरु गरिएको प्रहरीले बताएको छ ।
शुक्रबार दिउसो केही समय जिल्ला प्रहरी कार्यालयमा राखीएका बिकले प्रहरी अधिकृतसँग आफुलाई पार्टीले फसाएको आरोप लगाएको एक प्रहरी अधिकृतले बताए ।
बिकमाथि २०६५ चैत १३ गते बुटवलमा एमाले कार्यकर्ता प्रचण्ड थैबको गोली हानी हत्या गरेको अभियोग छ ।
थैव हत्याका मुख्य अभियुक्त भनिएका बिकलाई काठमाडौ प्रहरीले बिहीबार सुन्धाराको एक गेस्ट हाउसबाट पक्राउ गरेको थियो ।